Онлайн
Ժամեր անց Երևանում վայրէջք կկատարի պարետատան նախաձեռնած հատուկ չվերթով Չինաստանից Հայաստան տեղափոխվող ՀՀ պետական միջոցների հաշվին ձեռքբերված, Չինաստանի պետական մարմինների, ինչպես նաև հայ և չինացի բարերարների կողմից նվիրաբերած բժշկական պարագաների և սարքավորումների խմբաքանակը:
Այդ մասին քիչ առաջ ֆեյսբուքյան իր էջում կատարած գրառմամբ հայտնում է ՀՀ փոխվարչապետ Տիգրան Ավինյանը՝ միաժամանակ նշելով, որ տվյալ չվերթով Հայաստան են ժամանելու նաև օրեր շարունակ Չինաստանում Հայաստանի դեսպանությունում բնակվող ՀՀ երկու քաղաքացիներ, ովքեր անցնելու են 14-օրյա կարանտինային ռեժիմ:
Իսկ Հայաստան բերվում են հետևյալ անուն բժշկական պարագաներին և բուժսարքավորումները.
- 120 հատ թոքերի արհեստական օդափոխման սարքեր,
- 2 թթվածնի մատակարարման կայան,
- 60 000 հատ թեստ,
- 60 000 հատ բժշկական դիմակ,
- 280 000 հատ պաշտպանիչ դիմակ,
- 20 000 հատ պաշտպանիչ ակնոցներ,
- 100 000 հատ պաշտպանիչ արտահագուստ, ինչպես նաև դեղամիջոցներ:
«Շնորհակալություն ենք հայտնում Չինաստանի կառավարությանը՝ թռիչքի իրականացմանն աջակցելու համար, ինչպես նաև գործընթացում ներգրավված գերատեսչություններին:
Առանձնահատուկ շնորհակալություն թռիչքը իրականացրած օդաչուներին և Չինաստանում ՀՀ դեսպանությանը»,-եզրափակել է գրառումը Ավինյանը:
Նշենք՝ ՀՀ քաղաքացիները Չինաստանում ՀՀ դեսպանություն էին տեղափոխվել մարտի 28-ին այն բանից հետո, երբ Պեկինի օդանավակայանում բալիկի սպասող հայազգի զույգին չէին թույլատրել թռչել AEROFLOT ավիաընկերության Պեկին-Մոսկվա-Երևան չվերթի ինքնաթիռով. ուժի մեջ մտած ՌԴ օդանավակայաններից օտարերկրյա օդանավակայաններ և հակադարձ ուղղությամբ իրականացվող կանոնավոր և չարտերային ավիահաղորդակցության դադարեցման պատճառով ավիաընկերությունը տեղափոխել էր բացառապես Ռուսաստանի քաղաքացիներին:
